Acelerar o binomio industria-enerxía
Se de algo temos que ser conscientes as administracións e o tecido produtivo é de que o proceso de descarbonización da economía é inaprazable e imprescindible para mitigar os efectos do cambio climático. En Galicia temos claro que este contexto de transición enerxética e dixital hai que saber interpretalo en clave de oportunidade, co marco que nos brindan os fondos europeos Next Generation. Unha oportunidade para a reindustrialización verde e para reivindicar o noso potencial en enerxías limpas e novos vectores enerxéticos.
Dese binomio industria-enerxía é do que vai depender a competitividade da economía galega nas vindeiras décadas. E, por iso, os Orzamentos da Consellería de Economía, Industria e Innovación para o vindeiro ano, que presentamos esta mesma semana, son unha auténtica declaración de intencións. Manteñen a tendencia á alza e soben por riba da media do resto de consellerías, un 5%, ata os máis de 435 millóns de euros, cun obxectivo principal que é mobilizar a actividade económica e industrial en Galicia vinculada ás enerxías renovables. Mobilizar, no sentido de poñer á disposición do tecido empresarial todos os incentivos necesarios para captar novos investimentos, empezando pola eliminación da burocracia administrativa e pasando polo apoio financeiro -case 100 millóns de euros-, o acceso a solo industrial e o reforzo á innovación.
Cremos que vai ser un importante revulsivo nese sentido unificar na Oficina Económica de Galicia, dependente do Igape, todas as liñas de contacto, consulta, asesoramento e acompañamento ás empresas. E imos acometer un plan de aceleración de proxectos industriais, de tal xeito que rebaixamos as condicións para seren declarados estratéxicos -a partir de 2 millóns de euros de investimento- e garantímoslle un prazo de tramitación dun ano. E, doutra banda, prestamos atención especializada aos de menor tamaño que superen os 800.000 euros. Todo, no marco do que vai ser unha nova estratexia de política industrial, coa que faremos, ademais, unha prospección dos diferentes sectores en Galicia, tradicionais e emerxentes, para coñecer perspectivas e necesidades que plasmaremos en diferentes plans directores.
Como ata o de agora, a fórmula da colaboración público-privada vai seguir sendo indispensable; particularmente, para atraer capital externo con interese por investir en Galicia. Queremos que a ningún proxecto lle falte o financiamento necesario e, para iso, crearemos un fondo público-privado xunto con entidades financeiras, aseguradoras e xestoras de pensións, que vai contar cun capital inicial de 300 millóns de euros aos que a Xunta achega ata o 10 %. Nesta mesma liña, a iniciativa privada tamén vai ser clave na sociedade mercantil que se vai constituír ao amparo da futura lei de recursos naturais para investir en proxectos de renovables.
Estamos ante unha oportunidade histórica para Galicia, e particularmente para a provincia da Coruña, que vai ser o foco do que levamos reclamando que sexa unha transición xusta. Desde as plantas de hidróxeno verde previstas nas Pontes e Meirama, ata o proxecto de Resonac en A Grela ou a futura plataforma experimental de eólica mariña en Punta Langosteira. Nestes emprazamentos temos depositadas expectativas ligadas á aceleración do binomio industria-enerxía, pero estamos convencidos de que esa carteira de iniciativas medrará se existe un marco administrativo propicio que, simplificado ao máximo, pasa por facelo ben e rápido. Por esta orde.