El Español
Treintayseis
Opinión

É o momento do co-marketing

Cómo as colaboracións entre marcas son grandes oportunidades para obter bos resultados con pouca inversión
Xosé Luis Reza
Por Xosé Luis Reza

A semana pasada tiven a oportunidade de expoñer na Confederación de Empresarios da Coruña o porqué deste titular. Este é o momento do co-marketing, sen dúbida, pero só o é porque neste momento máis ca nunca precisamos de colaborar uns cos outros e afrontar unidos este novo momento.

En realidade esta ferramenta da P da Comunicación de Marketing existe dende que existen as empresas. Aínda que eu, teño que recoñecer que a puxen en práctica no meu último traballo por conta allea ás ordes dun xenio do marketing nacional chamado Rafael Sanguino.

Qué é o comarketing? Se buscamos en internet a súa definición atopamos ésta: “O co-marketing é a colaboración que xurde entre dúas marcas, que teñen obxectivos e intereses similares e cuxa unión se basa na posta en marcha de estratexias en común para conseguir chegar a máis audiencia”. E eu engadiría, chegar a vender máis e mellor ámbalas dúas compañías a un custo moito menor.

Estamos afeitos a ir ao supermercado e ver como as grandes marcas realizan accións en común para chegar a un número de clientes máis amplo: igoures con cereais, xeados con sabor a chocolate suizo, packs de desodorante e xel de baño… pero é que o co-marketing está ao alcance de todas as empresas, independentemente do seu tamaño.

Eso sí, para que a cousa funcione e falemos dun gañar-gañar, temos que partir de dúas premisas fundamentais. A primeira, as dúas empresas teñen que ter un público obxectivo similar -de pouco serviría facer unha acción de comarketing dun produto especialmente caro para un target con alta sensibilidade ao prezo-. E a segunda, teñen que compartir un posicionamento similar na mente dese cliente definido -por exemplo, se un produto é vendido como ‘ecolóxico’ non se pode aliar con outro que sexa ‘contaminante’. Algo rechina. Hai parellas que non coallan.

Imos ilústralo cun exemplo. Unha perruquería de señoras de alto valor percibido na Coruña. Posicionamento Premium. Cuxo público obxectivo son mulleres de idade entre os 35 e os 60 anos. Partimos da base de que temos un orzamento moi pequeno e non podemos baixar os prezos sen reducir a calidade do servizo e perder dito posicionamento Premium.

Qué poderíamos facer para conquerir máis clientes deste perfil? Sinxelo, o primeiro buscar na nosa contorna outros sectores que compartan ese posicionamento sofisticado e esa tipoloxía de cliente: xoierías, restaurantes Premium, ximnasios/clubes sociais, boutiques de moda, concesionarios de coche de alta gama… o segundo, achegarnos a eles e proporlles compartir unha acción de marketing operativo: busquemos algo para que as nosas clientas vaian ao seu establecemento e viceversa.

Por exemplo, boutique de roupa regálalle polo seu cumpreanos unha sesión de beleza na nosa perruquería, e pola contra, a perruquería regálalle polo Nadal un fular da boutique de roupa coa que nos asociamos. Máis exemplos, convida as clientes da perruquería  a tomar o té no restaurante coaligado, e recibe aos clientes do restaurante que fóron convidados a un peiteado cortesía do mesmo restaurante con motivo do seu aniversario…

As combinacións son infinitas. O resultado é directo e medible. E a fórmula creativa e simple. Por iso sempre dicimos que o marketing é puro sentido común. Non vos parece?

Xosé Luis Reza
Xosé Luis Reza
LinkedIn
Licenciado en Administración e Dirección de Empresas pola USC, MBA pola Escuela de Negocios Caixanova e Master en eBusiness pola Universitat Politècnica de Catalunya. Desenvolveu toda a súa carreira en diversas responsabilidades de Marketing e Comunicación en compañías como R Cable e Telecomunicacións Galicia, Fundación Semana Verde, Grupo Tecam e La Voz de Galicia. Na actualidade é socio consultor de iuni consulting e Presidente de Markea, Asociación Galega de Marketing e do Clúster da Comunicación de Galicia.